CASE 2500 ENFERMOS E SEGUEN AUMENTANDO OS FALECEMENTOS

Un home de 66 anos que estaba ingresado no Complexo Hospitalario Universitario da Coruña (CHUAC) faleceu este domingo con COVID-19, polo que a cifra total de mortes sitúase en 633 na comunidade.

No balance que fixo público este luns o Sergas, os casos confirmados por coronavirus ascenden a 2.452, 146 máis que onte domingo, e mantén a constante tendencia á alza do último mes. O total de enfermos diagnosticados nas últimas 24 horas é de 224 que resulta da suma dos 146, máis 77 curados e un falecido. O repunte alcanza tanto a enfermos en UCI como en plantas de hospitalización. Respecto ao día de onte, hai dous novos ingresos en unidades de críticos, por catro máis en áreas de hospitalización. Representan o 4% do total de enfermos por coronavirus da Comunidade. 2.370 positivos permanecen nos seus domicilios baixo seguimento médico. Así, o Sergas confirmou que a área sanitaria da Coruña mantense como a máis afectada, con 1.236 casos (29 máis que hai 24 horas), seguida pola área de Lugo, con 321 casos (17 máis) e a de Santiago, con 274 casos rexistrados (62 máis). Na área sanitaria de Ourense, este luns notificáronse 212 casos (9 máis); outros 155 na área de Vigo (un máis); 141 casos na área de Pontevedra (21 máis); e 113 casos activos na área de Ferrol (7 máis). Ata o momento contabilizáronse 633 falecementos por Covid-19 en Galicia. O último notificouse na tarde do domingo, e correspondeu a un home de 66 anos ingresado no Chuac coruñés, que presentaba patoloxías previas, segundo informou o Sergas. No ámbito das residencias de maiores, a Consellería de Sanidade avanza un novo positivo entre os usuarios destes centros, que ascenden así ata os 67, mentres que permanece estable a de 19 traballadores contaxiados. En total, desde que comezou a pandemia a Comunidade realizou 305.487 probas PCR para identificar aos afectados polo virus.