A HOSTALERÍA DE ESPAÑA E GALICIA RECLAMA OUTRAS MEDIDAS FRONTE ÁS NOVAS RESTRICIÓNS DE LECER NOCTURNO

HOSTELERÍA DE ESPAÑA considera que o sector non pode asumir máis medidas restritivas sen ningún tipo de apoio.

Ante as medidas anunciadas onte polo ministro de Sanidade, Salvador Illa, que afectan especialmente á hostalería, desde Hostelería de España consideramos que non se pode responsabilizar a un sector e centrar todas as actuacións sobre o mesmo, sen contemplar en ningún momento medidas compensatorias, para un sector que supón o 6,2% do PIB, e que dá emprego a 1,7 millóns de persoas. A caída da demanda que sofre a hostalería supón que a día de hoxe un 20% dos negocios hostaleiros non puidesen abrir aínda, e estímase que de aquí a final de ano uns 65.000 establecementos hostaleiros pechen definitivamente, supoñendo unha perda de empregos, entre directos e indirectos, de entre 900.000 e 1,1 millóns. Situación que pode empeorar se seguen regulando na liña do anunciado hoxe, sen contar co sector e sen ofrecer solucións de apoio á demanda e que garantan a viabilidade dos negocios. Desde Hostelería de España cremos que ante os alarmantes rebrotes debe actuarse con contundencia, e a seguridade de todos debe primar nas decisións, pero incidimos unha vez máis, na sensación de improvisación e falta de coordinación e claridade por parte do Goberno, o que impide aos empresarios poder establecer un plan de actuación e unha correcta organización, co consecuente impacto adicional na súa actividade. Para José Luis Yzuel, presidente de Hostalería de España: “o sector non pode seguir asumindo accións restritivas da súa actividade sen medidas de carácter compensatorio, tanto sobre as empresas como o emprego. Nestes momentos, a limitación de recursos non pode ser escusa debido a que as CCAA dispoñen de fondos de aplicación ao reforzo do sistema e as medidas sanitarias. Están a aplicarse medidas cuxo contexto é 100% sanitario e, por iso, tanto desde o goberno central como desde as CCAA deberíase contemplar, cada vez que se produzan medidas restritivas á actividade económica, destinar parte deses fondos a complementos de recursos que preserven o emprego. Á súa vez a Asociación Hostalaría Compostela tamén se mostra preocupada polas últimas medidas anunciadas como o peche de discotecas, salas de baile e bares de copas en toda España, así como a obrigación de pechar todos os locais como máximo á 1 da madrugada. “Lamentamos que non se nos informase previamente das causas da toma desta decisión”, sinalan desde a súa Xunta Directiva. Así mesmo, considera que este tipo de medidas non poden prolongarse no tempo sen unha alternativa de lecer nocturno para a poboación e advirte que esta situación pode levar a optar por outro tipo de encontros en espazos privados onde non hai ningún tipo de control, como os que se estaban levando a cabo no interior dos bares de copas e discotecas (control de aforo, distancia de seguridade, uso da máscara…). Estes peches súmanse á prohibición de fumar nas terrazas se non se pode manter unha distancia de 2 metros, unha norma que dificulta máis aínda o traballo nos establecementos pois ata o de agora podíase colocar mesas a 1,5 metros.; isto unido á obrigación de usar a máscara a excepción do momento de consumo, está a crear moita confusión entre a clientela, que cada vez máis decide quedar na casa por medo a ser multada.