O CONFINAMENTO NA MARIÑA NON SURTE EFECTO COMO ERA DE AGARDAR

O número de casos activos de coronavirus en Galicia aumentou en 11 ata os 256 este xoves, con 24 novos na área de Lugo --onde se rexistra un brote na Mariña-- e un en Santiago e 14 altas epidemiolóxicas --10 delas en Vigo--, mentres que as persoas curadas incrementáronse ata as 10.880. A Xunta de Galicia informa de 47 novos positivos en todos os tests, a maior cifra nun só día desde o 20 de maio, debido a que continúan confirmándose novos casos debido ao rebrote da Mariña lucense. A área sanitaria de Lugo xa acumula catro quintas partes dos contagios de coronavirus activos en Galicia. A provincia pasou de 166 a 190 infectados en 24 horas, segundo detallou este xoves a Consellería de Sanidade por medio do parte global de evolución. O total da Comunidade, por outra banda, suma 11 positivos máis e sitúase en 256. O rebrote na Mariña disparou os datos lucenses nos últimos días. A falta de coñecer cantos dos novos casos están vinculados ao foco, Lugo sumou nas xornadas recentes unha media de 20 infeccións diarias, todas elas, ou a maioría, asociadas ao episodio epidémico rexistrado na comarca. Mentres, o resto de áreas mantivéronse estables ou foron reducindo progresivamente a presenza da enfermidade. Na Coruña quedan actualmente 22 persoas en tratamento, en Vigo, 24; en Santiago, 14; en Pontevedra, 3; e en Ourense e Ferrol, só un. Hai ademais sete hospitalizados en toda a Comunidade (ningún deles en UCI), mentres que o resto, 249, permanecen con asistencia telemática e síntomas leves ou ben inexistentes nos seus domicilios. En total, case 11.000 persoas curáronse ata o de agora.