SIN FALECIDOS EN RESIDENCIAS, 4 NOS HOSPITAIS

Volven baixar os novos diagnósticos de coronavirus en Galicia e nas últimas 24 horas só reportáronse por test PCR 54 novos contagios, facendo un total de 8902 pacientes confirmados por proba PCR na comunidade. O baixo número de casos é un alivio despois do día de onte, cando houbo 151. A porcentaxe de crecemento foi de tan só o 0,61%, o segundo menor ata a data. Segue remitindo a pandemia en Galicia mentres se producen cada vez máis altas hospitalarias e na casa, xusto o día no que comeza a desescalada.

A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 3.235, deles 787 son da área da Coruña, 227 da de Lugo, 632 da de Ourense, 194 da de Pontevedra, 768 da área de Vigo, 476 da de Santiago, e 151 da de Ferrol.

Do total de pacientes positivos, 37 permanecen en UCI, 261 están en unidades de hospitalización e 2.937 no domicilio. Polo de agora, en Galicia hai un total de 5.981 persoas curadas, rexistrándose 557 falecementos.

O número de PCR realizadas é de 101.036

A Consellería de Sanidade informa do falecemento doutras catro persoas diagnosticadas por coronavirus, que elevan o total a 561 na Comunidade. Trátase dun home de 72 anos no CHUO, unha muller de 64 no CHUS e unha muller de 87 no Hospital do Barbanza, todos con patoloxías previas; aos que se suma un home de 86 no CHUO, sen patoloxías de base.

No conxunto de España a situación tamén segue mellorando aos poucos. Tras 1147 novos positivos por PCR o total nacional ascende a 216.582 contaxiados de coronavirus confirmados por este tipo de test. A cifra de falecidos alcanza xa as 25.100 persoas e a de curados os 117.248. A boa noticia é que a tendencia de novos falecidos segue sendo descendente, e hoxe foron de 276, a segunda mellor cifra en semanas e o terceiro día consecutivo que están por baixo de 300. O sábado pasado foron 378 vítimas.