O SACERDOTE INVESTIGADO POR ABUSOS SEXUAIS EN LIBERDADE

Segundo a información que publica hoxe o xornal La Opinión da Coruña o sacerdote salesiano investigado por presuntos abusos sexuais en xullo do ano pasado durante un campamento en Cambados quedará en liberdade á espera de xuicio.

Os feitos polo que está a ser investigado o sacerdote remóntanse a xullo do ano pasado e tiveron lugar durante un campamento da Orde Salesiana en Cambados.
Varios mozos puxeran en coñecemento da educadora supostas condutas anómalas por parte dun sacerdote salesiano. Tras a interposición da denuncia en Vigo, a Policía detivo ao sacerdote que posteriormente pasou a disposición xudicial. O xulgado de garda inhibiuse no de Cambados, onde permanecía prestando declaración.

Ás catro denuncias iniciais sumáronse outras tres, segundo confirmaron fontes policiais, dúas delas de dous menores que no primeiro atestado xa eran consideradas vítimas e ademais testemuñas e que interpuxeron a denuncia con posterioridade, prestando declaración en Comisaría. Finalmente so 6 foron as denuncias admitidas. O sacerdote foi detido e enviado a prisión provisional o pasado 22 de xullo despois de prestar declaración perante o xulgado de instrución 1 de Cambados en funcións de garda. O arresto produciuse despois de que a fin de semana anterior, durante un campamento de verán, varios dos mozos relatasen a unha das educadoras varios episodios nos que o denunciado someteulles a tocamentos, cando eles durmían.

A propia Dirección de Salesianos María Auxiliadora confirmaba a través dun comunicado que tras coñecer o relato dos menores tomáronse medidas de inmediato, apartando ao denunciado e poñendo marcha un protocolo no que se mantivo unha reunión coas familias ás que se lles informou do ocorrido e sobre o seu dereito para denunciar. Ademais a institución, que se mostrou consternada polo ocorrido e disposta a colaborar coas autoridades, iniciou de inmediato un expediente informativo.