GALICIA PECHA O DÍA CON TRES MORTOS POR COVID-19

Galicia rexistra tres novas vítimas mortais por covid-19: un home de 79 anos ingresado no complexo hospitalario da Coruña, unha muller de 88 ingresada no de Ourense e outro home de 86 hospitalizado en Santiago. Todos tiñan patoloxías previas. Elévase así a cifra total a 613 mortes, cinco delas durante esta semana. Destas, unha das persoas falecidas era usuaria dunha residencia de anciáns, centros onde a cifra total de vítimas é de 271.

A situación nos hospitais galegos mantén a tendencia á melloría do último mes. Hoxe hai 11 persoas na UCI, 8 menos ca o sábado pasado; 66 ingresadas en planta e 807 no seu domicilio. Onte rexistráronse 7 casos novos diagnosticados por PCR e 4 persoas contaxiadas precisaron hospitalización.

Neste momento quedan 884 casos activos na nosa comunidade e hai 9.684 persoas curadas.

Por áreas sanitarias, o número de casos activos descende ou mantense en todas. Vigo e A Coruña seguen á cabeza e Ourense e Santiago son nas que máis descenderon os casos nas últimas horas.