LIXEIRO REPUNTE DE ENFERMOS E 5 FALECEMENTOS MÁIS EN GALICIA

Os novos casos son superiores aos de onte. pero case a metade que os 410 do xoves pasado. O crecemento foi do 3,36%, o terceiro máis baixo.
Os casos totais de coronavirus en Galicia ascenden a 6758 tras os 220 novos contagios reportados hoxe. Aínda que o número é lixeiramente superior ao de onte (207) e tamén ao do martes (180) e o luns (207), segue sendo moi inferior ás cifras rexistradas a semana pasada (o xoves 2 de abril foi de 410 casos novos). O crecemento hoxe xoves 9 de abril foi do 3,36%, o terceiro menor ata a data, algo superior ao 3,26% de onte e ao 2,96% do martes 7.

A Dirección Xeral de Saúde Pública da Consellería de Sanidade informa que, na última actualización, o número de casos de coronavirus activos en Galicia ascende a 5.551, deles 1.148 son da área da Coruña, 563 da de Lugo, 1.041 da de Ourense, 470 da de Pontevedra, 1.069 da área de Vigo, 939 da de Santiago, e 321 da de Ferrol.

Do total de pacientes positivos, 154 permanecen en UCI, 794 están en unidades de hospitalización e 4.603 no domicilio. Polo de agora, en Galicia rexistráronse 910 altas de pacientes e 297 falecementos.

O número de PCR realizadas é de 36.799.

Cinco novas mortes elevan a cifra de falecidos a 293
Cinco persoas máis perderon a vida a causa do coronavirus en Galicia. Trala última actualización do Sergas, a comunidade galega rexistra xa 293 falecidos pola pandemia do Covid-19. Os últimos casos son os dun varón de 84 anos e unha muller de 89 que estaban ingresados no Hospital de Valdeorras, un home de 92 e unha muller de 62 hospitalizados no Chuvi de Vigo e un home de 82 no CHUS de Santiago. Todos eles tiñan patoloxías previas, afirma o Sergas.
No caso de toda España, rexístrase un lixeiro descenso no número de contagios novos e de falecidos. En total houbo 152.446 casos de contagios de coronavirus en España, con 5756 casos novos hoxe. Os falecidos ascenden a 15238 tras 683 decesos reportados. A situación segue sendo moi grave, pero as cifras son mellores que as de onte, cando houbo 6538 contagios novos e 757 falecementos.