INGRESAN EN PRISIÓN OS DETIDOS NA "OPERACIÓN LINCE"

As catro persoas detidas na Guarda (Pontevedra) o pasado domingo 29, acusadas de formar parte da organización que tratou de introducir 3.700 quilos de cocaína en Galicia a bordo de dúas planadoras, prestaron este mércores declaración por vía telemática ante a titular do Xulgado de Instrución número 2 de Cambados, que instrúe o caso. Tres deles fixérono na mañá deste mércores e un pola tarde, informaron fontes xudiciais. Do mesmo xeito que o fixo cos dous primeiros detidos, que xa se atopan en prisión, a xuíza tomoulles declaración por videoconferencia como consecuencia das medidas sanitarias extraordinarias adoptadas pola crise do coronavirus. Axentes da Unidade de Drogas e Crime Organizado ( Udyco) do Corpo Nacional de Policía, e do Equipo de Delincuencia Organizada e Antidrogas ( EDOA) da Garda Civil, ambos de Pontevedra, detiveron a estas catro persoas o domingo 29, un día despois de que fose requisado o alixo de droga. Entre elas atópase A. F. P., un coñecido das Forzas de Seguridade, con numerosos antecedentes por tráfico de estupefacientes. DOUS DETIDOS XA EN PRISIÓN A xuíza cambadesa que instrúe esta causa xa enviou a prisión a dous dos detidos neste operación. Trátase dun veciño da Illa de Arousa e outro de nacionalidade peruana detidos na madrugada do sábado 28 cando a lancha semirríxida na que transportaban a droga embarrancou nuns baixos na desembocadura do Río Umia, fronte ás costas de Cambados. Ambos foron acusados dun delito de tráfico de drogas en cantidade de notoria importancia, polo que a xuíza decretou para eles prisión provisional, comunicada e sen fianza.