APARECE O CORPO DO MARIÑEIRO DA ILLA QUE DESAPARECESE EN ONS

A embarcación 'Punta Roncadoira' dos efectivos da Xunta de Galicia localizou o corpo sen vida do tripulante da planeadoira afundida o pasado martes nas inmediacións da Illa de Ons, en Pontevedra. Segundo confirmaron fontes de Salvamento Marítimo, a embarcación, que participaba no operativo de procura, atopou o cadáver no mediodía deste venres despois de catro xornadas de rastrexo.
Tras días de procura por terra, mar e aire, o corpo apareceu entre Ou Centulo e Torre de Camouco. Foi localizado a uns 20 metros de profundidade polos mergulladores, tal e como confirmaron desde Salvamento Marítimo.
Traballaban na zona efectivos de Salvamento Marítimo e do Servizo de Gardacostas de Galicia. Igualmente, durante estas xornadas contouse coa axuda dos membros do GES de Sanxenxo, do Servizo Local de Protección Civil do Grove e de Ribeira, do GES de Muros, do vixiante do Parque Nacional das Illas Atlánticas e dos profesionais de Urxencias Sanitarias de Galicia-061. 

Salvamento Marítimo foi informada por Gardacostas ás 13,47 horas de que o corpo fora atopado. Así, realizouse o seu traslado por unha embarcación particular a Cabodeiro, na Illa de Arousa (Pontevedra), acompañado por un barco da Garda Civil. Sobre as 13,00 horas do pasado martes Salvamento Marítimo recibiu o aviso de que a embarcación 'Rosa', con tres tripulantes, envorcara por un golpe de mar ao norte de Ons. Tratábase dunha planeadoira con matrícula de Cambados e base na Illa de Arousa. Dous dos tripulantes chegaron a nado polos seus propios medios a terra a Ons, desde onde un, o patrón da embarcación, alertou a Salvamento Marítimo.