PIRAGUISMO CAMBADOS QUEDA SEGUNDO NA REGATA DE BOUZAS

O pasado sábado celebrouse na praia de Bouzas en Vigo a 4º Regata da liga Galega de Kaiak Mar. O evento organizado polo Club Kaiak Vigo contaba coa participación de 21 equipos e máis de 230 deportistas. Ás 16:00 da tarde daba comezo a competición coa saída ás categorías senior, xuvenil e veterano. Unha hora e media máis tarde tomarían a saída as embarcacións dos participantes cadetes xunto coas modalidades SUP. A clasificación xeral masculina do trofeo tivo como gañador ao Club Piragüismo Olívico (1377 puntos), mentres que a segunda posición sería para o Piragüismo Cambados (1079 puntos) e o terceiro posto levaríalla o Kaiak Vigo (723 puntos). Doutra banda a clasificación feminina terminaba co Piragüismo Olívico (465 puntos) en primeiro lugar seguido polo Piragüismo Illa de Arousa (264 puntos) e o Kaiak Vigo (241 puntos). A nivel individual destaca a vitoria en K1 Senior Sprinter masculino de Artur Pereira por diante de Miguel Pérez (Piragüismo Cambados) e a terceira praza obtívoa Luís Blanco (Náutico Firrete). Na modalidade K2 Sprinter Senior o podio completárono en primeira posición a parella do Club Piragüismo Olívico José María Díaz e Miguel Liaño, segunda praza para Andro Durán xunto a Samuel Viana (Piragüismo Cambados) sendo o terceiro lugar para Jose Collazo e Daniel García (Náutico Cobres).