FREDI LEIS, SALVADOR SOBRAL E KIKO VENENO, EN OS XOVES DE CÓDAX

Achégase unha das citas máis esperadas do verán. A oitava edición de Vos Xoves de Códax fixo público o seu cartel musical e, como sempre, o ciclo promete emocións fortes, compromiso social e eclecticismo nunha contorna privilexiada. Os concertos celebraranse do 4 de xullo ao 22 de agosto ás 20.30 horas na espectacular terraza da adega, coa participación de artistas procedentes de diferentes estilos, como o folk, o jazz, o rock ou a música electrónica. O compostelán Fredi Leis será o encargado de inaugurar esta oitava edición, o 4 de xullo; e tras el, será a quenda de Zenet e Najla Shami, que actuarán o día 11. Para pechar o mes de xullo, o día 18 actuarán Yumi Gipsy Band e Moisés Fernández. O mes de agosto incluirá catro concertos: o día 1, o de Sonia Lebedynski; o día 8, o pianista e compositor galego Abe Rábade actuará acompañado do portugués Salvador Sobral; o día 15 regresa Kiko Veleno, que compartirá escenario coa folktónica de Baiuca; e, finalmente, o día 22 de agosto actuará Gallaecia Small Band. Para cada un dos concertos poñeranse á venda 400 entradas, que só poderán ser adquiridas a través da páxina web da adega (www.martincodax.com). A partir do martes 4 de xuño ás 12.00 horas poderán comprarse as entradas para os concertos do mes de xullo, mentres que para os concertos de agosto haberá que esperar ao martes 2 de xullo, tamén ás 12.00 horas. As entradas teñen un custo de 15 euros e todo o recadado destinarase a diferentes entidades benéficas da zona.