O CAMBADÉS ROBERTO NÚÑEZ ACADA O MÁIS GRANDE PREMIO MUNDIAL A INDUSTRIA CREATIVA

O director creativo Roberto Núñez gaña un Wood Pencil nos D& AD Awards, polo packaging de 'Perfeccionista' de Adegas Davide
A pasada semana tivo lugar en Londres a 57 edición D& AD Awards Ceremony onde se outorgaron os galardóns que ano tras ano premian aos mellores traballos da industria creativa mundial. O cambadés Roberto Núñez, con estudo en Barcelona, foi un dos privilexiados premiados este ano co famoso Pencil, o trofeo con forma de lapis que os mellores creativos do planeta soñan con alcanzar algún día na súa carreira. O premio recibiuno na categoría de Packaging design, en Luxury, polo traballo "Perfeccionista", un viño premium de Adegas Davide, situada en Vilanova de Arousa (D.Ou Rías Baixas) cuxo alma máter é o vitivinicultor David Acha. De entre as máis de 10.000 inscricións recibidas de máis de 56 países, o xurado tan só considerou mereceder de premio a 3 proxectos da categoría. Segundo Roberto Núñez, "xa era todo un premio estar entre os 12 finalistas xunto con grandes marcas do luxo como Moët & Chandon, Hennessy, Shiseido, ou Jameson, ás que finalmente gañou".
Roberto é fillo do mestre e director xa xubilado, do colexio Magariños, Manuel Núñez

"Perfeccionista", é un viño de finca de edición limitada que ten a súa orixe nunha forma moi persoal de traballar, analizar e entender a natureza, nomeada como 'Viticultura Reflexiva'. Co obxectivo de conectar emocionalmente co consumidor e posicionar ao produto como un viño premium con personalidade, expúxose un packaging que pon en valor a idea de imperfección. As 697 unidades da edición limitada son diferentes entre si achegando un valor engadido ao produto. O proxecto enmárcase dentro do rebranding que Roberto Núñez está a realizar para a adega e que de momento se viu materializado nunha estratexia de produto e de comunicación, nunha nova imaxe corporativa, e no novo packaging. Os proxectos premiados formarán parte de " The annual D& AD Awards 2019", editado por Taschen, a biblia da creatividade para a industria creativa internacional.