UN FALECIDO AO CAER COA FURGONETA AO MAR NO PEIRAO DE PORTONOVO

Un home, veciño de Sanxenxo de 71 anos, morreu esta noite pasada ao caer cunha furgoneta ao mar no peirao de Portonovo, no concello de Sanxenxo. 

O vehículo caeu a auga arredor das 20.45 horas. Acudiron mergulladores do servizo de bombeiros de Sanxenxo que lograron rescatar o corpo do condutor a unha profundidade duns 20 metros, uns 40 minutos despois. A furgoneta foi achada a uns 50 metros aproximadamente do espigón, debido ás fortes correntes mariñas.

Os efectivos sanitarios trataron de reanimar a vítima pero non puideron facer nada por salvar a súa vida. Por agora descoñécense as causas do suceso. Segundo testemuñas presenciais, o condutor non reduciu a velocidade en ningún momento.

Ao lugar acudiron unha ambulancia, bombeiros e varias embarcacións de veciños que axudaron no rescate.