CORDAL INSTA AO PSOE A PRESENTAR UNHA MOCIÓN DE CENSURA CONTRA DURÁN NA MANCOMUNIDADE

O Portavoz de Somos Cambados e membro da Xunta da Mancomunidade do Salnés, Tino Cordal, anima ao PSOE comarcal a presentar unha moción de censura contra Gonzalo Durán no vindeiro plenario.

Logo das declaracións do Alcalde de Vilanova de Arousa e Presidente en funcións da Mancomunidade do Salnés (leva exercendo como tal dende o verán do 2015) contra a Presidenta da Deputación de Pontevedra, Carmela Silva, á cal chamou “chacha para todo” de Abel Caballero, Alcalde de Vigo, e tendo en conta que Durán xa manifestou que non ten ningunha intención de dimitir polas mesmas, Cordal cre que o PSOE comarcal debe promover unha moción de censura na Xunta da Mancomunidade contra o actual Presidente da mesma. Cordal, representante de Somos e de En Marea no ente comarcal apoiaría sen dúbida dita iniciativa.

Cordal comparte as declaracións que realizou onte Luís Villares, Portavoz Nacional de En Marea, cualificando as manifestacións de Durán como inaceptables e mostra dun machismo rancio, intolerable en política. Por iso, entende que se o Alcalde de Vilanova de Arousa e Presidente en funcións da Mancomunidade do Salnés non quere dimitir habería que cesalo ou botalo fóra.
Isto último é algo practicamente imposible no Concello de Vilanova, onde Durán dispón de maioría absoluta no pleno da corporación municipal, pero non na Xunta da Mancomunidade do Salnés na que a situación é ben diferente, ao non dispoñer o Partido Popular da mesma maioría. Neste sentido, Cordal lembra que o PP xa perdeu algunha votación na Mancomunidade, como sucedeu no caso da moción contra a eliminación da Área Sanitaria do Salnés, promovida polo concelleiro e portavoz de Somos Cambados.

Por outra banda, Cordal tamén critica o silencio cómplice dos compañeiros de Durán no Partido Popular, dende o Presidente da Xunta de Galicia, Alberto Núñez Feijóo, ata os portavoces municipais nos concellos da comarca do Salnés, como Luis Aragunde, portavoz do PP cambadés e candidato á alcaldía nas vindeiras eleccións municipais do 26 de maio de 2019.
Finamente, Cordal lembra que non é a primeira vez que un alcalde do Partido Popular de Galicia fai declaracións machistas, ten comportamentos machistas ou incluso son denunciados por prácticas machistas. Con todo, non podemos acostumarnos a que isto siga ocorrendo, pois estamos a falar de representantes políticos da cidadanía galega que cobran elevados salarios públicos, como Durán, e, xa que logo, deben exercer os seus cargos de maneira exemplar e respectuosa, dignificando á sociedade que representan.