SOLEDAD PENALTA GUIARÁ AO PÚBLICO POLA SÚA EXPOSICIÓN

A artista Soledad Penalta fará este sábado en Cambados un percorrido guiado polas obras que expón no Pazo de Torrado. Os interesados en participar deben inscribirse previamente no correo pazotorrado@gmail.com, xa que o número de prazas é limitado.

A exposición foi inaugurada o pasado 13 de abril e permanecerá aberta ata o 3 de xuño. Pódese visitar de martes a domingo de 17:00 a 20:00 hrs.

Soledad Penalta Lorenzo nace en Noia (A Coruña) en 1943. A vocación artística levouna á Escola de Artes Aplicada da cidade herculina tras os estudos de química e de filosofía e letras, coñecementos que, en calquera caso, acusará na súa obra máis persoal, tanto humanística como tecnicamente.

Titulada na especialidade de Cerámica, amplía estudos en Barcelona, co profesor Fernández Chiti, e na Bisbal, Xirona, en 1978 e 1979, data na que participa no seminario de Estudos Cerámicos de Sargadelos, Lugo. Outras modalidades da mesma parcela, como mayólica e gres, en Altea, Alacante. Bolseira pola Consellería de Industria da Xunta de Galicia, traballa en Faenza, Italia, con Emilio Galasi, e en Sotomayor, Pontevedra. En 1989 desprázase a Estados Unidos e segue diversos cursos en Minnesota. Comezou a expoñer en mostras colectivas na Coruña, en 1978, e particularmente na súa cidade natal, en 1981. A súa obra exhibiuse en cidades de toda Galicia e en exposicións itinerantes por diversos puntos de España. Recibiu distincións en certames de Galicia. Posúe obra súa o Museo Bello Piñeiro de Ferrol e institucións galegas varias. É autora dun monumento público en Porto do Son, A Coruña, e de obra no museo ao aire libre das inmediacións da Torre de Hércules. Aínda que é importante a obra cerámica desta artista, a súa personalidade máis calada e definidora está nas pezas en ferro, na que absorbeu modos que se inician en Gargallo e van ata Chillida. Son emocionantes, pola sinxeleza resultante e a complexidade do concepto, os seus xogos cos planos. Domina a xeometría e recréase na aproximación, tanxencia, fusión de planos e polígonos, creando volumes que resultan en poliedros irregulares, a modo de cuarcitas e basaltos que traballa ata que parecen encartarse ou expandirse, ou formando conxuntos caprichosos, como estalactitas ennegrecidas.

Escultora desde 1972, goza sucesivamente do traballo con cerámica, cerámica de alta temperatura, refractarios, fundición de bronce, fundición de ferro, ferro en ferros soldadas, escultura de gran formato para exterior. Vive no estudo, no campo, coa súa familia. A súa obra é a súa linguaxe ou unha linguaxe que ela fala. Emociónanlle os problemas da xente e quere que se solucionen, apoia sen ningunha dúbida aos que queren axudar a solucionalos. Non, non quere ser a única, pero está aí.....