O CAMBADÉS GUSTAVO REY SUBCAMPIÓN DE ESPAÑA DE TIRADORES DE CAÑAS DE CERVEXA

O cambadés Gustavo Rey, de O Encontro de Barrantes (Ribadumia), proclamouse subcampión do V Campionato Nacional Estrela Galicia de Tiraje de Cervexa, cuxa final se celebrou hoxe luns no Salón de Gourmets coa participación de 20 hostaleiros de toda España. O cambadés, con moitos anos de experiencia, soubo demostrar no seu exercicio a paixón coa que vive a súa profesión. De feito, é a segunda vez que se presenta a este certame. “Participar noutras edicións fixo que me mergulle completamente na cultura da cervexa e todo o que iso leva. Para min, quedar subcampión é un gran orgullo, que me levo á miña terra e da que sinto hoxe especialmente representante”, expresou nada máis finalizar o campionato. 
O primeiro posto foise para Alacante, da man de Davinia Martínez, do restaurante O Divino, de Orihuela, quen tras alzarse co premio apuntaba: “Estou feliz de conseguir este título. Era a primeira vez que me presentaba e non me esperaba chegar a ser a campioa, porque o nivel na final foi moi alto”. 
A nova Mellor Tiradora de Cervexa de España do V Campionato Estrela Galicia afirma ser unha apaixonada da cervexa e da solemnidade que hai detrás dun bo servizo de cervexa. Segundo ela, para tirar unha boa cervexa “tes que pensar en que a estás preparando para ti mesmo. Por iso hai que ser moi preciso á hora de tirar a cervexa e ter varias pautas en mente”. A dotación económica para o gañador foi de 1.000 euros e un trofeo. 
O subcampión recibiu 600 euros, e entregáronse tamén tres accésits de 150 euros aos outros tres finalistas, entre eles, o compostelán Óscar de Toro.