CAMBADOS INTENSIFICA A CAMPAÑA PARA RECLAMAR A SEDE DO CONSELLO D.O. RÍAS BAIXAS

O Concello de Cambados prosegue coa súa reivindicación para trasladar á vila do Albariño a sede do Consello Regulador da Denominación de Orixe Rías Baixas, que desde o ano 2003, por capricho da presidenta do C.R.D.O. e a pouca forza do PP local está no Pazo de Mugartegui en Pontevedra. O Goberno local argumenta que o municipio é "a capital do Viño Albariño, foi o seu berce e segue sendo a súa casa, pois é onde máis viño albariño prodúcese e a que máis adegueiros e viticultores ten de toda a Denominación de Orixe Rías Baixas". Sinala o Executivo municipal que "desde tempo inmemorial o nome de Cambados e do Salnés vai asociado ao albariño, celebrando a Festa do Albariño desde hai máis de 65 anos".

"Na actualidade, ao redor do 75 % dos viticultores da Denominación de Orixe Rías Baixas son veciños do Salnés e máis do 65 % do viño prodúcese na nosa comarca" e lembran que "no ano 2107 Cambados foi a Cidade Europea do Viño, un recoñecemento internacional concedido pola Rede Europea de Cidades do Viño, sendo o primeiro municipio galego en conseguir tal galardón".

Por todas estas razóns, "Cambados merece ser a sede do Consello Regulador da Denominación de Orixe Rías Baixas", argumentan, e por iso buscan apoios nos distintos concellos da comarca do Salnés para que presenten unha declaración de apoio nos plenos das distintas corporacións municipais.

Este acordo xa foi aprobado nos concellos de Vilanova, A Illa de Arousa, O Grove e Vilagarcía e Ribadumia e agárdase que tamén se faga en Meaño, Meis e Sanxenxo. Para o concello de Cambados, "a localización da sede do Consello Regulador da D.O. no municipio non só resultaría beneficiosa para a Capital do Albariño, senón tamén, para toda a comarca do Salnés, especialmente para os seus numerosos adegueiros e viticultores". Ademais de reparar unha "inxustiza histórica", situar a sede do Consello Regulador en Cambados constituiría un extraordinario impulso económico para o tecido comercial e industrial cambadés e comarcal que redundaría na xeración de riqueza e na tan necesaria creación de emprego, inciden.