O CONCELLO DE CAMBADOS RECIBE UNHA NOVA ACHEGA DA DEPUTACIÓN

A Deputación de Pontevedra leva entregado o 76,55% do total destinado a Cambados dentro do Plan, cun investimento situado en máis de 700.000 €

A Deputación de Pontevedra vén de aprobar por resolución provincial unha nova achega ao concello de Cambados no marco do "Plan Concellos 2017", dentro da súa liña 1 de investimentos. Nesta ocasión, a institución provincial, presidida por Carmela Silva, achegará 20.049,34€ para a sinalización turística e o pintado do casco urbano da vila.

Ao abeiro do "Plan Concellos 2017", anteriormente a institución provincial xa destinara a Cambados outros 341.934,87 euros en liña 1 para a humanización das rúas Ourense e Pontevedra, para o parque infantil de Beleco, para rematar as melloras das beirarrúas da avenida de Vilariño, para dotar de infraestruturas aos núcleos de Veiga e Fonte do Couto, para dotar de mobiliario as oficinas municipais, para facer un traslado do servidor do concello e a súa páxina web, para mellorar o acceso aos colexios de A Pastora e Os Olmos, para a construción dun muro no colexio de Corvillón e para a instalación dun colector de saneamento e cunetas de pluviais en Cortiñas de Abaixo, en Corbillón. Amais tamén se destinara 138.554,85 € en liña 2 para o pagamento de gastos correntes dos seus servizos municipais e para as actividades do Samaín, o Magosto, o Nadal, a Semana Santa, a Festa da Vieira, as Letras Galegas, a Festa dos Maios e o Entroido e, finalmente, 207.565,98 € cos que Cambados puido contratar a 30 persoas que desenvolveron as súas profesións nos distintos servizos municipais da vila.

Coa suma desta nova achega, Cambados xa ten recibido da Deputación de Pontevedra o 76,55% do total do investimento que lle corresponde dentro do "Plan Concellos 2017", isto é, 708.104,41 euros dun total de preto de 925.000 €.