GADIS DARÁ REGALOS AOS SEUS CLIENTES CON MOTIVO DAS LETRAS GALEGAS

A compañía distribuirá 30.000 libros de contos, marcapáginas cunha pasaxe de "A galiña azul" e máis de dous millóns de bolsas cun fragmento de obras de Carlos Casares.

Supermercados Gadis súmase un ano máis á celebración do Día das Letras Galegas cunha serie de accións culturais que conmemoran esta data. Nesta ocasión, a empresa enfoca as súas accións nos nenos e pon en valor a literatura infantil e xuvenil galega da man de dous autores destacados: Carlos Casares, escritor homenaxeado o próximo 17 de maio, e Helena Villar Janeiro, pioneira na creación de obras en galego para os máis pequenos. 

A compañía publica "Contos do sol e dá lúa", un recompilatorio de contos da escritora, ilustrados pola pintora Ana Costas. A publicación consta de sete relatos independentes entre si, cunha extensión apropiada para os máis pequenos. En conxunto coas coloridas ilustracións, esta serie de narracións móstrannos un mundo de fantasía e enxeño que resultará atractivo para os nenos, aínda que tamén o poderán gozar os maiores. Estando a maioría ambientadas en Galicia, pero tamén fóra das nosas fronteiras, estas historias reúnen escenas cotiás da infancia, como a integración dun neno estranxeiro nun colexio galego ou o momento de escribir a carta aos Reis Magos. 

FRAGMENTO DE A GALIÑA AZUL (1968)

Estes días anda o pobo un pouco alborotado. Acórdaste dun rapaz que se chama Lorenzo e que andaba sempre na compaña dun can pequeniño de rabo zuro? Pois Lorenzo ten unha galiña azul con cinco plumas vermellas na á dereita. 

É unha galiña moi bonita e moi rara. Pon ovos de colores. Xa puxo dous marelos, un rosa e tres verdemar. Ademais non di cacaracá como as outras galiñas senón que di cocorocó. E isto ten preocupadas ás autoridades. 

Tan preocupadas as ten que hai catro días chegoulle un oficio a Lorenzo pedíndolle que entregara a galiña polas boas. Lorenzo negouse, porque aínda que lle din que só é para que a vexa o veterinario, o certo é que, segundo dixo o señor Casimiro, o porteiro do Concello, á galiña vana matar. 

O alcalde, Manolito Listón, dixo nunhas declaracións que fixo para a televisión e para os periódicos, que non se podía tolerar a existencia dunha galiña azul, porque -según Manolito Listón- unha galiña azul que pon ovos de colores e que di cocorocó en vez de cacaracá non é unha galiña como é debido.

FRAGMENTO DE UN PAÍS DE PALABRAS (1998)

Debo agradecerlle ao meu avó que desde neno me ensinase que os contos, como a vida, non son máis que detalles e que o tempo simplemente non existe.