OLGA OSORIO E JUAN GALIÑANES PREMIO MESTRE MATEO AO MELLOR CURTA

A Academia Galega do Audiovisual celebrou onte no Palexco na cidade da Coruña a súa festa anual na gala dos Premios Mestre Mateo 2017, galardóns que cumprían nesta edición tres lustros.

Na categoría Curtametraxe de Imaxe Real, a cinta gañadora foi Einstein-Rosen, de Olga Osorio, que contou cos seus dous fillos como protagonistas neste proxecto ambientado no verán de 1982. A recoller o premio subiron Olga a sua parella Juan Galiñanes e os dous actores e fillos da parella.

Juan Galiñanes competía tamén ao premio de Mellor Anuncio pero finalmente non foi o gañador.

A longametraxe 'María y los Demás' foi a gran triunfadora da XV edición dos premios Mestre Mateo da Academia Galega do Audiovisual con cinco galardóns, entre eles, o de mellor película nunha gala en que se reivindicou o papel da muller na industria audiovisual e se fixo un chamamento a máis papeis para mulleres.

A actriz protagonista de 'María y los demás', Bárbara Lennie, obtivo o premio á mellor interpretación feminina.

A segunda no palmarés foi a serie da TVG 'Dalia, A Modista', que obtivo catro premios: interpretación feminina de reparto (Covadonga Berdiñas), dirección de arte, vestiario e maquillaxe e barbaría.

Pola súa banda, conseguiu tres premios Mestre Mateo o documental Esquece Monelos: mellor documental, dirección de fotografía e montaxe.

O premio ao mellor programa de televisión recaeu no programa da noite dos xoves na Televisión de Galicia 'Land Rober Tunai Show', que tamén contou con outro galardón, o do seu condutor, Roberto Vilar, quen se levou o Mestre Mateo ao mellor comunicador de televisión.

No apartado de traballos actorais, ademais do galardón para Bárbara Lennie, Luís Tosar levouse o premio ao mellor actor protagonista por Cen Anos de Perdón.

O Mestre Mateo para a mellor interpretación masculina de reparto foi para Monti Castiñeiras polo seu traballo en Serramoura e a feminina para Covadonga Berdiñas por Dalia, A Modista.