AS OBRAS DO PROXECTO DE PROMOCIÓN AO EMPRENDEMENTO COA CREACIÓN DUN VIVEIRO INDUSTRIAL NA NAVE LOXISTICA DE SETE PIAS DARAN COMEZO A VINDEIRA SEMANA

- As obras teñen un custe de 74.953,06 € e darán comezo a vindeira semana unha vez se asine a acta de comprobación de replánteo, cun prazo de execución de 23 días, tendo que estar rematadas as obras antes do 15 de novembro. - Permitira a construción do primeiro Viveiro Industrial para Emprendedores de xestión municipal na Comarca do Salnés, que xunto co Centro de Desenvolvemento Local supón un pulo importante pola aposta nos Emprendedores e a promoción económica en Cambados. - O Concello de Cambados abre o prazo para a presentación de solicitudes dos catro locais do Viveiro Industrial e a zona de CoWorking para emprendemento comercial no Centro de Desenvolvemento Local.
O titular da Concellaría de Economía, Facenda, Industria, Promoción Económica e Comercio de Cambados, Xurxo Charlín xunto co Arquitecto Técnico municipal e responsables da empresa adxudicataria entre as 12 empresas que se presentaron ao concurso de licitación das obras de acondicionamento do Viveiro Industrial, a mercantil Canalizaciones y Construcciones Salnés, S.L., estiveron no día de onte visitando a Nave Loxística do Polígono onde se van realizar as obras do Viveiro Industrial para Emprendedores, e que terá un custe de 74.953,06 €, tendo previsto o comezo das obras a vindeira semana cun prazo de execución das mesmas de 23 días, tendo que estar xustificada a finalización das mesmas antes do vindeiro 15 de Novembro ante a Consellería de Economía e Industria.
Creación de catro locais para Viveiros Industriais
As obras a realizar van ser a construción dunha rampa de acceso o terreo elevado por onde disporán de acceso as futuras naves. Posteriormente realizarase as obras de urbanización precisas para dotar de acceso as futuras naves de acceso rodado e servizo de auga, sumidoiros, electricidade e auga. A continuación efectuaranse as divisións previas da nave, abrirase o acceso a cada unha delas, dotándoas dun portalón e porta peonil, así como do resto de servizos e acometidas. Para rematar dotarase a zona de oficinas de mobiliario suficiente para poder instalar nelas zonas administrativas que cada caso requiran esas naves. Estas obras van permitir a construción do primeiro Viveiro Industrial da comarca do Salnés de xestión municipal dentro da Nave Loxística, nunha nave municipal de 1.534 metros cadrados.
Ábrese o prazo para a recepción de solicitudes dos locais do Viveiro Industrial
Aqueles emprendedores que están interesados en ocupar unha destas naves do Viveiro Industrial poden presentar a súa solicitude no Concello de Cambados, tratase de 4 micronaves para un perfil de persoas emprendedoras que comezan coa súa actividade; válenos absolutamente calquera sector e calquera franxa de idade para que poida ser un xerador de emprego. Para consolidarse terán dous anos, o prazo máximo que marcan as bases do proxecto, e ademais do espazo que terán na nave que se lles asignará, tamén contarán coa posibilidade de utilizar servizos comúns como despachos, sala de reunións, e ata, un lugar de asesoramento en caso de ser preciso. Neste Viveiro Industrial de Cambados vanse acondicionar catro locais que oscilarán entre os 332,80 e os 499,20 metros cadrados e cuxo prezo de aluguer estará entre os 349,44 € e os 524,16 € o mes, co fin de facilitar aos emprendedores a posibilidade de iniciar a súa actividade e poder introducirse no mercado elixido.
Novos espazos de CoWorking para o emprendemento comercial no CDL. Dende a Concellería de Economía, Facenda, Industria, Promoción Económica e Comercio, que dirixe Xurxo Charlín, entendemos que o emprendemento é o motor do desenvolvemento e a colaboración a enerxía que o move, polo que consideramos preciso impulsar novas zonas de Coworking empresarial, e con tal motivo estase a traballar na creación dunha aceleradora de negocios comerciais no rural, sustentada en espazos de traballo inspiradores e comunidades de persoas apaixonadas polo que fan. Estes novos espazos de CoWorking forman parte da aposta decidida no Concello de Cambados á hora de fomentar o emprego e crear espazos que favorezan o emprendemento, neste caso, relacionado có sector comercio, favorecendo zonas de Coworking no Centro de Desenvolvemento Local, con asesoramento aos comerciantes locais e aos futuros emprendedores, apoiando a súa formación específica e clarexando ás dúbidas que se lles plantexan á hora de iniciarse na actividade, de modernizar ou aplicar ás Tic´s para mellorar e potenciar a venta dos produtos locais. Este nova zona de CoWorking para emprendedores de Comercio no Rural ten un custe de cesión de uso para os usuarios de 36,40€/mes, para aqueles novos emprendedores dispoñan dun local onde traballar dentro do CDL cun prezo reducido. As persoas interesadas en optar a un espazo dentro do CoWorking para emprendemento comercial do Centro de Desenvolvemento Local do Concello de Cambados poden presentar a solicitude no Concello de Cambados.