ÉXITO NO COMEZO DAS CLASES DE PILATES PARA MAIORES

Este venres 8 de xullo deu comezo o obradoiro de Pilates para persoas maiores organizado por Cruz Vermella e a biblioteca municipal Luís Rei.

O obradoiro de Pilates encóntrase dentro do proxecto dirixido a maiores “Saúde Constante”, para o que Cruz Vermella conta coa financiación do Ministerio de Sanidade, Servizos Sociais e Igualdade, e ten como obxectivo mellorar a calidade de vida das persoas maiores de 65 anos no seu proceso de envellecemento.

Cubertas as 15 vacantes dispoñibles, trátase dun curso gratuíto que se levará a cabo os venres de xullo e agosto de 11.30 a 12.30 da mañá. As clases serán impartidas por unha monitora especializada e faranse tanto no interior como no exterior da Casa dos Fraga.

Con esta actividade en concreto, preténdese reducir o impacto negativo do deterioro físico das persoas maiores. O método Pilates é beneficioso debido á súa capacidade de adaptación ás necesidades de quen o practica. Ademais, permite o aumento da flexibilidade, a forza, o equilibrio e o ton muscular, axuda a previr lesións, desgaste e caídas, aumentando así a seguridade nun mesmo e a súa autonomía.

Grazas ao apoio de Cruz Vermella, a Biblioteca Municipal pretende incentivar este tipo de actividades colaborativas para maiores de 65 anos co voluntariado desta institución, dado o éxito da anterior e primeira experiencia para este colectivo co obradoiro de pintura “Arte e saúde” que se celebrou o pasado inverno e que mesmo tivo listaxe de espera.