O PINTOR "CAMBADES" EDUARDO BAAMONDE ACADA O PREMIO ERNESTO GODAY

O cadro de Eduardo Baamonde, pintor afincado en Cambados, titulado “Porto Meloxo” foi elixido como gañador do III Concurso Ernesto Goday de pintura de O Grove. Os membros do xurado, reunidos onte mércores, destacaron a alta calidade dos participantes e quixeron, ademais, engadir tres mencións especiais que acompañarán ao primeiro premio. Trátase das obras "Praza de Arriba" de Carlos Álvarez Besada, "Mariscando" de Manuel Carballeira e "Porto do Grove" de José Miguel Besada.

Tódalas obras participantes estiveron expostas na Sala de Cunchas e Sala das Dornas do Concello dende hai máis dun mes. Os membros do xurado puideron así, ver todas e cada unha delas con detalle antes de emitir o seu fallo. A entrega do premio e das mencións especiais terá lugar o vindeiro venres, 4 de marzo, precisamente na Sala das Cunchas.

O certame deste ano sufriu certo retraso con respecto as últimas edicións anteriores,derivadas da ampla actividade cultural do concello que dificultou poder realizar a montaxe e presentación da mostra das obras participantes.

Para o ano 2016 celebrarase a IV edición deste premios que homenaxean a un dos artistas fundamentais da historia da Grove. Haberá unha revisión das bases, establecendo uns prazos concretos de exposición e fallo do xurado.

Info: Pontevedra Viva