A XUNTA QUERE ACABAR CO "FEÍSMO"

A medida non é nova, pero a Xunta está decidida a que, esta vez si, o sexa o seu cumprimento.

A entrada en vigor, o vindeiro sábado, da Lei do Solo abre a vía para multar aos propietarios de vivendas inacabadas que non rematen as fachadas. O marco legal contempla que o incumprimento da orde de execución das obras para acabar co ladrillo visto dará lugar á imposición polos concellos de sancións coercitivas que poden sumar 25.000 euros en 15 meses.
Para evitar que os alcaldes se inhiban, como sucedeu coa norma do 2002 ante as instrucións do bipartito, a nova converte en obrigación municipal o que ata agora era unha potestade.
A Administración renuncia a «esixencias máximas» sobre os materiais para empregar, pero si reclama uns mínimos en canto a un recebado exterior que evite o impacto desas vivendas sobre o «patrimonio común». O presidente da Fegamp, o socialista Alfredo García, incide nas reticencias dos alcaldes, que agora autorizarán as edificacións en chan rústico. «É un problema de pedagoxía, máis que de legalidade», obxecta García, que cre que a Xunta debe implicarse con axudas económicas aos propietarios desas casas sen recebar.

Remate exterior

Fachada e cuberta. A obrigación de rematar as vivendas afecta tanto á fachada como á cuberta. Isto inclúe, ademais de cerramentos e muros, a carpintería exterior: portas e xanelas. No caso de que o propietario dunha casa sen acabar non atenda a orde municipal para completar eses traballos, o concello procederá á súa execución forzosa coa imposición de sancións coercitivas. O seu importe pode alcanzar os 10.000 euros desde un mínimo de 1.000, cando coa lei actual eran 600. No caso de que o dono da casa siga negándose, as multas duplicaríanse cada trimestre ata acumular ese máximo de 25.000 euros en 15 meses: 1.000 da primeira, 2.000 da segunda, 4.000 da terceira, 8.000 da cuarta e 10.000 da quinta. A maiores, a infracción leve que supón deixar unha edificación sen finalizar leva de entrada unha multa de 300 a 600 euros. A lei permite ao concello asumir as obras necesarias e pasar a factura ao propietario.


Casas sen construír

Prórroga de licenzas caducadas. Unha das grandes novidades do novo marco normativo é a posibilidade de prorrogar varias veces a licenza de obra nos casos nos que expirase o prazo de tres anos que establece ese permiso municipal. Nesas leiras que seguen ocupadas por tempo indefinido con edificios dos que só se levantaron cimentos e pilares, a Xunta supeditará a ampliación do prazo da licenza a que o promotor realice previamente as obras de acabado exterior, tanto da cuberta como da fachada. O Executivo atende así unha petición de alcaldes e promotores.

Regularización

Edificios anteriores ao plan urbanístico. A nova lei, que tamén prohibe as urbanizacións illadas, dará seguridade xurídica aos donos de miles de casas e naves construídas antes de que o concello no que se localizan tivese plan urbanístico, polo que eran consideradas como fóra de ordenación. Só quedarán á marxe desta regularización as edificacións en zonas verdes ou que afecten a viarias ou equipamentos públicos, nas que só estarán permitidas obras de mantemento.

Simplificación

Menos trámites e máis rápidos. A principal razón de ser da nova Lei do Solo é simplificar a confusa tramitación do plan, que agora empantana aos concellos durante máis de 8 anos de media. A norma reduce os informes autonómicos a un, implanta o silencio positivo se a Administración non se pronuncia en tres meses, e ofrece un plan básico aos concellos con menos de 5.000 habitantes.