MAÑÁN COMEZA A PROGRAMACIÓN DO DIA EUROPEO DO VIÑO

A Ruta do Viño Rías Baixas inicia mañá a súa programación polo Día Europeo do Enoturismo cun Taller de Memoria Sensorial para Invidentes en colaboración con ONCE. É a primeira ocasión en que unha Ruta do Viño de Galicia desenvolve unha actividade deste tipo.

A Ruta do Viño Rías Baixas inicia mañá, mércores 4 de novembro, a súa programación especial con motivo do Día Europeo do Enoturismo cun Taller de Memoria Sensorial para Invidentes. Esta actividade desenvólvese en colaboración con ONCE Galicia, a través do presidente do Consello Territorial de ONCE Galicia, Carlos Fernández. A actividade dará comezo ás 19.00 horas no Museo do Viño de Cambados e diríxese exclusivamente a asociados de ONCE.

"Esta é a primeira ocasión en que unha ruta do viño de Galicia ofrece unha actividade dirixida a este colectivo. Fomos incluídos na Guía de Enoturismo Accesible editada pola Plataforma Representativa Estatal de Persoas con Discapacidade Física (PREDIF), polo que consideramos adecuado desenvolver este taller de memoria sensorial e achegar aos socios de ONCE o mundo da viticultura e a enoloxía dun modo diferente", afirma a xerente da Ruta do Viño Rías Baixas, Lorena Varela.

Esta experiencia sensorial estará dirixida polo catador Nacho Costoya, quen achegará aos asistentes nos distintos aspectos da enoloxía e da cata de viños axudándose de sentidos: olfacto, gusto, tacto e oído. Así mesmo, utilizaranse fichas de cata e etiquetas en braille, diferentes tipos de cortizas, froitas, músicas, etc.; todos estes elementos axudarán aos asistentes, a difrutar e coñecer o mundo dos viños Rías Baixas.