FESTAS DE SAN ROQUE EN CAMBADOS

A de San Roque foi antigamente unha das festas máis importantes de Cambados, aínda que pouco a pouco foi perdendo fol. En 2014 non se celebrou, pero un grupo de familiares decidiron coller as rendas da comisión organizadora e este ano volven celebrar o evento, con enerxías e ilusións renovadas. Os actos, que completan un fin de festa na localidade, empezan mañá sábado coas alboradas dos cruceiros de Vilalonga e Con de Xido de Castrelo, acompañados dos tradicionais cabezudos e papamoscas, e xa pola noite amenizan a verbena Nova Era e Caché.

O día grande dos festexos é o domingo 16. A alborada corre a cargo esta vez dos grupos Os Cruceiros e da Asociación Músico-Cultural de Ribadumia, unha vez máis acompañados polos papamoscas e os cabezudos.
A misa solemne é ás 12,30 horas, cantada pola coral Santa Mariña de Cambados. Pola tarde hai misa ás 20 horas, e despois sae a procesión, da que tamén formarán parte os Danzantes de Adulacións. Cando se recolla a procesión empeza unha verbena coa formación Gran Casino.

A comisión tamén fai un chamamento porque necesitan xente para portar os cabezudos e papamoscas, así como nenos para facer de peregrinos na procesión. O novo colectivo está formado por Alberto García Rial (presidente), Baldomero García Camiña(vicepresidente), Amadeo Abal Roma (secretario), Manuela Rial Costa (tesoureira), e os vogais Antonio e Carlos Rial Costa e Adrián García Rial.