LOUZÁN COMPARECE MAÑÁN ANTE O XUÍZ EN CAMBADOS

O presidente da Deputación de Pontevedra e do PP provincial,Rafael Louzán, e o deputado e concelleiro de Pazos de Borbén,Severino Reguera, foron citados para este mércores polo xuíz de instrución número 2 de Cambados para poder defenderse dos feitos que recollen na querela que hai un ano presentou o fiscal pola que lles imputa un presunto delito de suborno. Trátase dunha vista preliminar que contempla o artigo 25 da Lei do Xurado onde se enmarca este procedemento polo que está previsto que ambos os dous políticos declaren unha vez que o fiscal presente formalmente os cargos de imputación contra eles e os letrados poidan exercer o seu dereito de defensa.

Tras esta comparecencia, o xuíz terá que decidir se arquiva o caso; se continua coa investigación para que as defensas poidan achegar máis probas, mesmo citar testemuñas propostas pola parte demandada, ou ben acordar a apertura de xuízo oral con tribunal popular previsto nestes procesos penais.

O propio Louzán confirmou que acudirá a declarar ao xulgado e subliñou que "por fin terá a oportunidade de aclarar as supostas irregularidades" que recolle o fiscal na súa denuncia sobre a compra e aluguer duns baixos comerciais en Navia (Vigo) en 2008. "Estou absolutamente tranquilo e confiado en que esta investigación se peche o antes posible" que -insistiu- se cingue exclusivamente á miña vida persoal e non política", limitouse a comentar o presidente da deputación.