UN XUÍZ DE CAMBADOS ABRE UNHA INVESTIGACIÓN A LOUZÁN

O Xulgado mixto número 2 de Cambados acordou incoar dilixencias por supostos delitos de suborno contra o presidente da Deputación e do PP de Pontevedra, Rafael Louzán, a súa esposa e o deputado provincial do PP Severino Reguera ao apreciar indicios dun presunto delito de suborno. O titular do xulgado, Juan Manuel Hermo, encontrou elementos para sustentar a querela presentada no seu día contra os tres pola fiscalía de Pontevedra.

A denuncia da fiscalía produciuse tras advertir que o deputado provincial e concelleiro de Pazos de Borbén Severino Reguera, propietario dunha cadea de panadarías, estaba a aboar prezos moi superiores aos do mercado por uns locais alugados a Louzán e á súa esposa. Os acusados solicitaron o arquivo da causa, pero o xuíz rexeitouno ao entender que "o resultado das dilixencias de indagación realizadas permiten soster que os feitos investigados poderían dar lugar a un delito de suborno impropio no caso do deputado e a un delito continuado de suborno no caso do presidente da Deputación e a súa esposa", segundo informou o Tribunal Superior de Xustiza de Galicia nun comunicado.