MARIÑEIROS DO CERCO CHAMADOS A XUICIO

Varios dos mariñeiros que participaron en marzo deste ano nas protestas que tiveron lugar en Vigo en contra das cotas de xurelo e xarda están sendo chamados a xuízo como imputados por desordes públicos.

 

Así o denuncia a Asociación de armadores de Cerco de Galicia (Acerga) que apunta que nos últimos días varios mariñeiros e armadores recibiron citacións para acudir ao xulgado de instrución número 4 de Vigo. 

 

O pasado marzo tiveron lugar varias protestas, principalmente en Vigo, de  pescadores e armadores que denunciaban o reparto das cotas de xurelo e xarda. Entón, denunciaron que os responsables públicos “venderan” ao sector que, ademáis de no caso de Galicia, con 154 barcos pasaría de 6.000 quilos diarios de xurelo a 2.000 en todo o ano mentres que os vascos, cunha flota de 44 barcos “levarían o 70% da cota de xarda e o 60% de xurelo”. Finalmente, e tras as presións do sector galego chegouse un acordo entre as flotas galega, cántabra e vasca no reparto das cotas.

 

Algunhas protestas tiveron lugar polas rúas de Vigo, co corte da rúa Beiramar, e outras diante da delegación da Xunta nesta cidade. Algúns dos mariñeiros imputados están acusados de queimar contedores do lixo, cortar o tráfico e guindar pedras. De feito, varios deles foron detidos entón por estes feitos.  

 

Pero, sen embargo, a protesta máis numerosa foi a que tivo lugar uns días despois en Santiago, fronte ao Parlamento de Galicia, onde houbo unha virulenta carga policial que rematou con varios feridos e detidos, incluídos varios parlamentarios. A actuación policial foi, despois, duramente criticada polos partidos da oposición.