ESTA NOITE É MEIGA. MAÑÁN É SAN XOÁN

Moitos galegos cumpriremos esta noite cos rituais propios da noite de san Xoán. Saltar a cacharela, bañarse no mar ou lavar a cara coa auga que se fai cunha mestura de plantas son algúns dos máis coñecidos dunha tradición tan vella coma a propia memoria.
Esta noite conta con numerosos ritos e lendas propias. Todos como actos purificadores e que espantan o mal. Saltar as cacharelas, lavarse coa auga feita coas herbas de San Xoán, bañarse no mar, quedarse cun tizón do lume ou facer falcatruadas son algunhas das que marca a tradición.
Son ritos asociados ao lume, propios dos humanos dende tempo inmemorial e que o cristianismo adoptou para facelos propios. 

Espantar os meigallos en San Xoán con sardiñas frescas pode saír algo caro. A que colleron á mañá vai a 14 euros; a da noite, a 12 e a do sábado a 10 euros.
Así o comentaban esta mañán nas prazas de abastos de varios puntos de Galicia.

O cerco non traballou esta noite, si pequenas embarcacións que traballan ó xeito. A escaseza segue sendo a tendencia pero a que hai é bastante boa. Nunha semana a sardiña duplicou o prezo. Sardiña escasa e cara para espantar o meigallo un ano máis.