OS TRÁXICOS NAUFRAXIOS DOS ÚLTIMOS ANOS

De confirmarse a morte dos tripulantes que aínda permanecen desaparecidos, o do Santa Ana converteríase nun dos naufraxios máis dramáticos dos últimos anos. 

O tráxico récord de vítimas nas costas galegas ségueo tendo o Bahía, un pesqueiro con base en Cambados que se afundiu preto das illas Sisargas o 2 de xuño de 2004, ao parecer por un golpe de mar. Morreron os seus 10 tripulantes, case todos de Redondela. Só se recuperaron os corpos de 6.
Entre eles non estaba o do cambadés Antonio Domínguez tan apreciado na nosa vila.

Hai que remontarse despois a 1991 para lembrar un naufraxio de características similares que tinguiu de loito a vila de Malpica. 9 mariñeiros perderon a vida, case todos menores de 24 anos. Ían a bordo do pesqueiro Os Tonechos que se afundiu ó chocar contra unha rocha.
En febreiro do 2005, o volanteiro Siempre Casina, con base en Burela naufragou a 20 millas de Ribadeo. Levaba 9 mariñeiros. Só un, Xerardo Taboada, conseguiu sobrevivir.
A mesma sorte correron 5 dos 13 tripulantes que ían a bordo do Rosamar, un barco portugués con armador de Burela. Eles contaron como o barco se afundiu en menos dun minuto, despois de que a súa propia rede quedara enganchada no fondo.