"GRAN HERMANO" NAS RIAS GALEGAS

O "Gran Hermano" nas rias galegas xa está aquí.

O proxecto Videoguard, un sistema de videovixilancia intelixente para a prevención e persecución da pesca e do marisqueo furtivos, estará en período de probas ata finais de ano. Este tempo servirá á Xunta para valorar a viabilidade de implantar o sistema na costa galega, aproveitando as infraestruturas de telecomunicacións xestionadas polo operador público Retegal, dependente da Axencia para a Modernización Tecnolóxica de Galicia (Amtega).


A pilotaxe deste proxecto arrancará no primeiro semestre do ano en dous municipios costeiros do litoral galego, segundo explicou na Comisión 8ª do Parlamento o subdirector xeral de Gardacostas, Lino Sexto, en resposta a unha pregunta sobre este tema.
O responsable de Gardacostas dixo tamén que o Proxecto Videoguard está desenvolvido por un consorcio de empresas tecnolóxicas integrado por Coremain, Bastet Ingeniería, TRC, Retegal e coa participación do Centro Tecnolóxico Gradiant, cun investimento de 1,8 millóns de euros, financiados con fondos do programa Innterconecta a través da Consellería de Economía e Industria e o CDTI.

Catro empresas a saber por quen son participadas. 
Quen controlará as imaxes?. 
Quen dirá que é ou non é delito?. 
Porque eses cartos non se empregan na vixiancia a pe de praia?
Quen pode estar tranquilo nas nosas praias sabendo que vai a estar vixiado?


O proxecto garante o respecto á privacidade requirida pola LOPD na monitorización e procesado de vídeo en espazos públicos, empregando técnicas de ocultación selectiva daqueles patróns visuais que puidesen permitir a identificación de persoas e embarcacións nas gravacións. Pero son humáns quenes van visionar as imaxes que poden ser susceptibles de seren manipuladas.