O C.R. RIAS BAIXAS EMPEZA A PENSAR NOS VITICULTORES

O Pleno do Consello Regulador celebrado o 18 de decembro de 2013 aprobou, entre outros asuntos, a data tope para que os asociados que así o consideren poidan solicitar, ao propio pleno, que modifique excepcionalmente os rendementos de produción para cada campaña. A data aprobada é o día 20 de xullo de cada ano.
Este acordo xustifícase en razóns cualitativas, xa que o Pleno, co preceptivo informe técnico, dispoñerá de marxe para estudar o tema e adoptar unha decisión nun prazo suficiente que permita informar aos viticultores. Á súa vez, estes terán marxe para actuar sobre a planta, con prácticas  aceptadas como a poda en verde, os desnetados ou os esfollados. Os vocales do órgano plenario consideran que este traballo redundará nunha mellora da calidade do froito. 

Na mesma sesión plenaria, e tamén de acordo co reglamento do Consello Regulador, aprobáronse as cotas que deberán abonar os asociados en concepto de taxa, tanto pola superficie inscrita, como pola cualificación de viño ou por precíntalas. En todos os casos, mantéñense os mesmos importes aprobados en 2011 e vigentes desde entón sen variación. Son 5 euros por cada 1.000 metros cadrados de superficie de viñedo inscrita e 66,66 euros por cada 1.000 litros de viño cualificados. 

En canto ás cotas de novas inscripciones, o Pleno do Consello Regulador acordou reducir o seu importe ata os 25 euros. Isto supón unha redución do 75% respecto de o abonado ata agora. Trátase dunha decisión fundamentada na situación de crise económica que está atravesando o noso país.