BENITO GONZÁLEZ DEBERÁ PASAR OUTRA VEZ POLO XULGADO

O xulgado de Cambados admitiu a trámite a denuncia presentada por varios integrantes da Agrupación de Mariscadores de Vara contra Benito González, o patrón maior da confraría de Cambados na que está englobada este colectivo con independencia organizativa.

A causa desta denuncia, que foi presentada a principios deste mes, relaciónase cunhaapropiación indebida de 2.783 euros dos rañeiros. Segundo se relata no escrito de denuncia, a confraría levou a cabo un desconto de 100 euros a cada un destes mariscadores a través de dúas cotas para a compra extra de semente de ameixa para batea, a pesar da oposición da Agrupación. Os denunciantes afirman que se lles retirou ese diñeiro en outubro das vendas en lonxa aplicándolles ademais o IVE correspondente e, non obstante, as sementes non chegaron a comprarse nunca.

A denuncia foi presentada por 24 rañeiros encabezados por Carlos Manuel Martínez que recorda que o patrón maior da confraría está imputado xa en dúas causas por malversación de caudais públicos, unha tramitada en Santiago e a outra no xulgado número 2 de Cambados.