APROBADOS OS PRESUPOSTOS DA DEPUTACIÓN PARA O 2014

A institución provincial destina 93,4 millóns a investimentos nos concellos

A Deputación de Pontevedra aprobou hoxe o seu orzamento para o ano 2014 de forma automática ó non presentaren alegacións nin os grupos políticos, nin os sindicatos nin as entidades ou particulares. Os orzamentos acadan os 146,8 millóns de euros.

Louzán destacou que o dato máis salientable das contas provinciais para o vindeiro ano é que se destinarán 93,4 millóns para investimentos nos concellos da provincia: 51,7 proceden da incorporación de remanentes e 41,7 son para os gastos correntes dos concellos, os investimentos nestes e as transferencias.

Nos investimentos derivados da incorporación de remanentes destacan 12,4 millóns para estradas provinciais, 9,7 para o Plan de Investimentos (PID), 11,5 para desenvolver os proxectos municipais DepoGap e DepoTic –a implantación da Administración electrónica–, 12,8 millóns para o Plan de Obras e Servizos Municipais (POS) e 4,9 para as instalacións deportivas e recreativas.

Pola súa banda, os investimentos xestionados pola Deputación para os concellos alcanzan a cifra de 26,4 millóns: neste capítulo destacan as melloras, os proxectos e as expropiacións nas estradas provinciais (10 millóns), as instalacións recreativas e de lecer (2,5 millóns) e as obras nos concellos (12,5 millóns). A cantidade restante (1,4 millóns) está dirixida a investimentos relativos a temas medioambientais, á arqueoloxía e ó turismo.

Finalmente, os orzamentos da Deputación de Pontevedra inclúen 15,3 millóns para gastos correntes e transferencias, para investimentos dos concellos en capítulos coma servizos comunitarios básicos (2,2 millóns), Plan de Emprego (3,2 millóns), actividades (1 millón), grupos de emerxencias, obras municipais, conservatorios, escolas de música e outros.

Para financiar este orzamento a Deputación de Pontevedra non acudirá a préstamos e, polo tanto, non haberá incremento da débeda. Este ano a institución provincial amortizou 15 millóns de débeda, co cal a débeda da Deputación non chega ó 60% dos seus recursos correntes.