CLAUSURADO O OBRADOIRO DE EMPREGO DA LANZADA

O presidente da Deputación, Rafael Louzán, salientou este martes que o centro de A Lanzada seguirá dispoñible para novos obradoiros de hostalería.

Para Louzán hai "absoluta compatibilidade " entre o uso do centro de A Lanzada como aloxamento no marco do programa Pousadas do Salnés e como aula de formación para os obradoiros de hostalería, asegurando que estas instalacións "estarán dispoñibles para próximas edicións desta iniciativa de emprego", que a Mancomunidade xa volveu a solicitar.

Louzán participou este martes no acto de clausura dos cursos do obradoiro Hostalería do Salnés IV xunto coa conselleira de Traballo e Benestar, Beatriz Mato; o presidente da Mancomunidade, Gonzalo Durán; e o alcalde de O Grove, Miguel Ángel Pérez, que destacaron o éxito destes obradoiros, que xa acadan a cuarta edición.

Trinta e seis alumnos recibiron o seu diploma  de cociñeiro, camareiro de restaurante-bar e camareiro de planta.

Louzán fixo fincapé no extraordinario marco no que se desenvolve este obradoiro de emprego e na súa idoneidade, dado que se trata "da comarca máis turística de Galicia" e, en consecuencia, dunha área na que se precisa de persoal ben formado para seguir apostando por un turismo de calidade.

O presidente da Deputación felicitou a alumnos e profesores e amosou o seu desexo de que esta iniciativa teña continuidade en anos vindeiros, co obxectivo de darlle unha oportunidade de formación cada día a máis persoas.

Cunha duración de 6 meses e 8 horas diarias de clase, os alumnos recibiron formación teórica e práctica en cada unha das especialidades, así como clases de orientación laboral, iniciación á informática, idiomas, prevención de riscos laborais, sensibilización de xénero, concienciación medio ambiental e manipulación alimentos, entre outras materias transversais.