AS OFICINAS LIQUIDADORAS CADA VEZ MÁIS LONXE DO USUARIO

As oficinas liquidadoras de Cambados e Vilagarcía están en risco de desaparición.

Uns 150 traballadores das oficinas liquidadoras dependentes dos Rexistros da Propiedade en Galicia están a piques de perder o seu emprego como consecuencia da próxima creación da Axencia Tributaria Galega. A perda dos postos de traballo é só unha parte do problema porque a reforma, que implicaría a desaparición das oficinas de Cambados e Vilagarcía, obrigaría aos usuarios da comarca a ter que desprazarse a Vigo, Pontevedra ou Santiago para realizar calquera trámite.

As oficinas liquidadoras forman parte dunha concesión aos rexistradores da propiedade desde fai uns cen anos sobre a que agora se está en negociación para cambiar as súas condicións. A Xunta propón que algunhas destas dependencias queden como ?oficinas caixa de correos? para recibir e remitir documentación á Administración autonómica e informar aos usuarios. O problema é que coas asignacións económicas expostas na nova negociación os rexistradores consideran inviable o mantemento deste servizo.

Os traballadores afectados indicaron que, concretamente en Cambados, onde se atopa a oficina competente para o distrito hipotecario que abarca ademais deste municipio, os de Meaño, O Grove, Meis, Ribadumia e Sanxenxo, a supresión da oficina liquidadora suporía obrigar aos veciños, previa chamada telefónica para a concertación de cita, a desprazarse a Vigo, Pontevedra ou Santiago, cos gastos de desprazamento e incomodidade que iso xera.
No peor dos casos ese afastamento da Administración ao cidadán ocasionará, ademais deses gastos, que se delegue en xestores, administradores ou avogados a tramitación de, en moitos casos, documentación sinxela que pode un presentar persoalmente. A falta de asistencia obrigaría ao cidadán a contratar servizos de información que actualmente se prestan con carácter gratuíto?.

Os empregados das oficinas de toda Galicia, tras unha primeira reunión, están levando a cabo un labor de recollida de firmas en contra da desaparición deste servizo. Advirten que esta recollida de firmas é só unha das primeiras medidas a tomar e que pronto empezarán a barallar medidas máis contundentes para facer chegar aos cidadáns a problemática e as repercusións da desaparición destas oficinas.