AS LIBRARÍAS GALEGAS APOSTAN POR DEMORAR A SUBIDA DO I.V.E.

A Federación de Libreiros de Galicia recomenda aos seus socios non subir o IVE do material escolar na 'volta ao cole', a pesares que a partir do 1 de setembro este imposto pasará a ser do 21 por cento para as libretas, bolígrafos ou cartolinas.

Fontes desta federación confirmaron que esta recomendación foi aprobada no seo desta entidade, que conta con seis agrupacións por toda Galicia, e que agora cada libraría deberá tomar a decisión de forma particular, en función das súas posibilidades.

Con todo, xa hai librarías que acordaron esta medida, como as de Ourense asociadas á federación, que o acordaron por unanimidade, ou no Grove. Neste caso, os catro establecementos desta localidade pontevedresa non subirán o IVE ao material escolar ata o 30 de outubro, co fin de "non repercutir nas economías familiares" e que non aumente o custo da 'volta ao cole'.

As librarías que se sumen a esta iniciativa terán un cartel anunciador nos seus escaparates polo que será fácil identificalas.

Así as cousas, todo o material escolar manterá o seu prezo nas librarías que se acollan a iniciativa polo menos ata o 15 de outubro, "a pesar de a entrada en vigor da nova medida imposta polo Goberno central é a partir do 1 de setembro".

Por outro lado, dende a asociación recordaron que o IVE dos libros de texto se mantén no 4 por cento, fronte ao aumento ao 21 por cento que experimenta, por decreto, o material escolar.