SR FEIJOO OS DATOS SON CLAROS...NON PODE CO PARO!!!

O paro subiu en 10.300 persoas no segundo trimestre en Galicia en relación co primeiro trimestre do ano, un 3,89% máis, até 275.900, co que a taxa alcanzou o 21,07%, segundo os datos da Enquisa de Poboación Activa (EPA) feita pública este venres polo Instituto Nacional de Estatística (INE).

Atendendo á variación interanual --segundo trimestre de 2012 respecto ao segundo trimestre de 2011--, o incremento foi de 56.300 persoas na Comunidade Autónoma galega, un 25,64% máis.

En termos absolutos, o aumento do número de desempregados en Galicia foi o quinto maior por comunidades no segundo trimestre respecto ao primeiro, con 10.300, só despois dos incrementos experimentados por Andalucía (+33.300), Castela-A Mancha (+13.700), País Vasco (+10.900) e Comunidade de Madrid (+10.700).

Tamén en termos porcentuais a subida do paro intertrimestral na Comunidade galega é a quinta da lista, do 3,89%, por baixo das da Rioxa (+14,16%), País Vasco (+7,77%), Asturias (+5,28%) e Castela-A Mancha (+5,02%).

No conxunto estatal, o paro subiu en 53.500 persoas no segundo trimestre do ano respecto ao trimestre anterior, un 0,95% máis, situándose o número total de desempregados en 5.693.100 persoas, cifra inédita até agora para a economía española. A taxa de paro escalou ao peche de xuño até o 24,63%, porcentaxe case dúas décimas superior ao do trimestre anterior (24,44%).

CAE A OCUPACIÓN EN 16.800 PERSOAS

A Enquisa de Poboación Activa reflicte, así mesmo, un descenso da ocupación en Galicia, ao perder 16.800 persoas ocupadas no segundo trimestre en relación co primeiro, un 1,6% menos, até 1.033.700.

Ao termo de xuño deste ano o número de ocupados reduciuse en 57.700 persoas en relación coa cifra de ocupación que se rexistraba finalizado o segundo trimestre de 2011, unha caída do 5,28%.

En termos intertrimestrales trátase da cuarta maior baixada do nivel de ocupación por comunidades autónomas, despois das reducións de Andalucía (-23.300), Castela-A Mancha (-19.500) e Cataluña (-19.100).

MÁIS PARO E OCUPACIÓN EN HOMES QUE EN MULLERES

A taxa de actividade sitúase no 55,36% e a de paro no 21,07% no segundo trimestre en Galicia para ambos os sexos. No que se refire aos homes, con 546.000 ocupados e 152.100 parados, a taxa de actividade sobe ao 61,83% e a de paro tamén repunta ao 21,78%.

Pola súa banda, as mulleres ocupadas son 487.700 e as paradas 123.800, polo que a taxa de actividade baixa ao 49,45% e a de paro tamén, ao 20,25%.

POR PROVINCIAS

Por provincias, o maior número de parados concéntrase en Pontevedra, con 116.900 desempregados. Séguelle A Coruña, con 104.800 persoas en paro e Ourense e Lugo, con 27.600 e 26.600, respectivamente.

En canto á taxa de paro, a distribución é distinta, pois se coloca á cabeza Pontevedra, co 25,58% de paro; seguida de Ourense, co 20,43%; A Coruña, co 18,64% e Lugo, co 17,13%.

A ocupación é maior na Coruña (457.400 persoas) que en Pontevedra (339.900). A ambas lle seguen Lugo (128.800 ocupados) e Ourense (107.500 persoas).

MÁIS DE 16 ANOS E POBOACIÓN ACTIVA

A 31 de xuño de 2012, Galicia contabiliza 2.365.700 persoas de 16 anos e máis, 5.100 menos que ao termo de marzo deste ano (-0,21%). En relación co segundo trimestre de 2011, o descenso é de 11.800 persoas de 16 anos e máis, un 0,5% menos.

Pola súa banda, o número de activos situouse ao termo de xuño na Comunidade Autónoma en 1.309.600 persoas, 6.500 menos que no anterior trimestre (-0,49%) e 1.400 menos que no segundo trimestre do pasado exercicio (-0,1%).