PROSEGUE O CONFLICTO BOMBEIROS-CELTA PRIX

No medio do proceso para a adxudicación da xestión dos parques de bombeiros da provincia, os profesionais do consorcio presentaron unha denuncia contra Celta Prix, a empresa que desde hai dez anos encárgase destas funcións, á que acusan de incumprir o convenio que rexe o servizo.

Os enfrontamentos entre os bombeiros e Celta Prix, actualmente en concurso de acredores, veñen de atrás. Acúsana de non cubrir as baixas de persoal, de non realizar as necesarias revisións de material nin promover a formación continuada dos traballadores. «A todo isto habería que sumar as continuas presións que exerce sobre os traballadores con expedientes inxustificados e despedimentos nulos e improcedentes», situación que levou ao persoal a unha folga indefinida que, en teoría, aínda segue en pé.

Por todo iso, en marzo os sindicatos e a empresa, baixo a tutela de Inspección de Traballo, acordaron crear unha comisión paritaria para velar por estas cuestións, comisión que nunca se chegou a facer efectiva. Ante esa situación, o pasado 2 de xullo, os representantes sindicais dos bombeiros acudiron ao servizo de conciliación, e como a empresa non se presentou, acordaron denunciar os feitos ante o Xulgado do Social.

Entre outras cuestións, os bombeiros denuncian irregularidades nas horas extras. Como por falta de persoal teñen que facer moitas, a empresa os chama e, por convenio, págalles a 14 euros a hora, ata un máximo de 120 euros. Pero cando un bombeiro fai unha garda de substitución, páganlla tamén a 120 euros e non como unha xornada de traballo, que vai de 240 a 280 euros.

Pero as protestas afectan a outras moitas cuestións que teñen que ver co material, coas quendas, coa falta de persoal, cos despedimentos... Por iso, ante o proceso de adxudicación da xestión do servizo, os bombeiros queren curarse en saúde e piden á Administración que non permita que Celta Prix se presente, xa sexa en solitario ou utilizando outro nome nunha suposta unión temporal de empresas, e suxiren que o adecuado sería que o servizo se adxudicase a unha empresa con experiencia en urxencias. Como se sabe, Celta Prix opera, sobre todo, co servizo de lixos. «A Administración -din- debería velar para que eses 22,2 millóns de euros sexan xestionados por unha empresa seria».

Tamén se queixan por cuestións relacionadas co prego de condicións, onde se recolle que en Vilagarcía deberá haber un bombeiro máis por quenda pero, ao mesmo tempo, amplíaselles o campo de acción a cinco municipios máis.

O prazo que teñen as empresas interesadas en xestionar os parques de bombeiros da provincia finaliza o día 21; ata esa data poden presentar as ofertas. Sábese que xa hai firmas interesadas que estes días se achegaron polos parques para coñecer as instalacións e presentar as súas propostas ante o consorcio de bombeiros.