A LIBERDADE DE HORARIOS XERARÍA POSTOS DE TRABALLO SEGUNDO A ASOCIACION DE CENTROS COMERCIAIS

A liberalización de horarios no comercio de todo o territorio nacional, coa conseguinte apertura dos centros comerciais en domingos e festivos, favorecería a creación de preto de 37.400 novos postos de traballo, segundo cálculos da Asociación Española de Centros Comerciais (AECC), que sostén que máis de 2.000 deses empregos xeraríanse en Galicia.

En concreto, sinala que os 531 complexos comerciais existentes en España xeran actualmente 310.736 empregos, que se elevarían a un total de 348.123 se puidesen abrir todos os días, salvo catro festivos (de Nadal ou Semana Santa, por exemplo).

Ante a actual situación de crise e de descenso do consumo, a asociación afirma que a implantación da liberdade horaria, como a que se producirá na Comunidade de Madrid a partir do 15 de xullo, suporía un crecemento do emprego no sector en todas as comunidades autónomas.

A Comunidade de Madrid, con 7.187 novos postos de traballo, é a rexión onde se estima máis creación de emprego, seguida de Andalucía (6.211), Comunidade Valenciana (4.481), Cataluña (3.713), País Vasco (2.972) e Galicia (2.096).

O presidente da AECC, Javier García-Renedo, sostén que a situación que atravesa o sector comercial "require tomar medidas de xeito inmediato, ou no caso contrario verase como unha porcentaxe importante do comercio estará abocado ao peche".




Neste sentido, defende que aquelas decisións "que vaian na dirección de favorecer o consumo e a creación de postos de traballo deben ser prioritarias e de alcance nacional".

A AECC defende a implantación do principio de liberdade de empresa e comercio, o que, segundo subliña, "implica, entre outras moitas cousas, a liberdade de horarios de apertura ao público, a defensa do libre mercado e da libre competencia".