ASEMBLEA CONSTITUINTE DO N.P.C.

O coñecido como Novo Proxecto Común (NPC) celebra este sábado en Santiago de Compostela a súa Asemblea Nacional constituínte con máis de 2.000 persoas inscritas, na que elixirán nome para esta formación que se define con carácter "nacionalista" como "expresión política do galleguismo", enmarcada na "tradición plural da esquerda e nas novas expresións desta". 

Ademais, elixirán unha coordinadora nacional que sairá da lista de consenso que se propón para este acto, e na que están o líder do Encontro Irmandiño, Xosé Manuel Beiras, e o seu número dous e alcalde de Teo, Martiño Noriega.



A constitución deste proxecto farase despois de que os independentistas de Causa Galiza decidan abandonar as asembleas do Novo Proxecto Común, situándose "á marxe" deste acto, tras o que denominan unha "frustración das expectativas depositadas inicialmente no proxecto".

Nun comunicado, Causa Galiza, que celebrará á marxe de calquera outro movemento nacionalista, como cada ano, os actos do 25 de xullo, critica ao que denominou "sanedrín irmandiño, ao que acusa de pilotar o proceso dende arriba, tramando pactos na trastenda.

Así mesmo, os independentistas criticaron que o curso do proceso "evidenciou a vixencia, baixo novos formatos, dos peores vicios e prácticas que, curiosamente, se denunciaban ata a saciedade en declaracións mediáticas, reunións e documentos", en referencia ás críticas dos 'irmandiños' por esas prácticas no BNG, fronte da que se escindiron tras a asemblea de Amio.