POLÉMICA NO GROVE POR UN CARTEL

Tras recibir un oficio da Secretaría Xeral de Igualdade, a Xunta de Goberno acordou requirir a Sentolos Racing a retirada dos carteis anunciadores da súa V Concentración Moto Turística por entender que son “publicidade sexista”. O motoclub xa anunciou que vai recorrer esta decisión.

Cartel da polémica

Segundo se recolle no escrito remitido desde o Concello ao colectivo organizador da V Concentración Moto Turística Internacional do Grove, que se vai celebrar na vila os días 7 e 8 de xuño, a Secretaría Xeral de Igualdade da Xunta de Galicia remitiu á administración local un oficio respecto dunha denuncia por publicidade sexista que foi recibido o pasado 7 de xuño. Ao día seguinte, a Xunta do Goberno Local acordou requirir ao motoclub a retirada duns carteis nos que se emprega a imaxe dunha muller ao carón da dunha motocicleta.

Y. Reboiras competindo.

Neste requirimento da Xunta de Goberno tamén se indica que contra este acordo, Sentolos Racing pode interpor un recurso de reposición ou ben acudir directamente aos Xulgados do Contencioso Administrativo de Pontevedra.

A este respecto, Sentolos Racing xa manifestou a súa vontade de interpoñer un recurso “inmediatamente” por non entender “as causas de dita denuncia”. O presidente do motoclub, Yamandú Reboiras confirmou que ademais deste recurso, neste colectivo estudarán tamén levar a cabo “algunha medida de protesta” contra unha decisión que consideran “ridícula” e que “non ten sentido ningún”.

Unha decisión que, na opinión de Reboiras, tivo a súa orixe na denuncia dun particular á Secretaría Xeral de Igualdade. Pero será contra o Concello, que é quen dita o requirimento, contra o que terán que interpoñer o pertinente recurso no prazo estipulado, como confirmou o alcalde, Miguel Ángel Pérez, quen explicou tamén que esta cuestión foi trasladada á Xunta de Goberno pola concelleira responsable da área de Igualdade, Aida Filgueira.