BOMBA NA SEDE DO PP EN RIBADUMIA

Un artefacto explotou hoxe ás catro da madrugada na sede do PP en Ribadumia provocando danos na fiestra e no interior do inmoble.

 O local está no baixo dunha casa de pedra e no primeiro piso vive un matrimonio coa súa filla de 16 anos, que se espertaron co ruído crendo que explotara a caldeira. Saíron fóra e xa viron unha fenda na fiestra da sede e os cristais rotos. Javier Oubiña, o inquilino da casa, di que había dous paquetes máis que non chegaron a explotar pero que saíron disparados con forza alén da rúa.

 Os Tedax xa estiveron no lugar para analizar os explosivos. Afortunadamente, non había coches aparcados na beirarrúa e tampouco hai que lamentar danos persoais. O baixo é dunha tía de Javier Oubiña e o PP leva dez anos de aluguer. A dona di que agora se pensará se llo segue alugando.

 O artefacto, de fabricación caseira, estaba composto por unhas bombonas de cámping gas, segundo informan desde Protección Civil de Ribadumia.

Hai mes e medio foi desactivado outro artefacto explosivo na sede do PP de Meis, tamén no Salnés.