BENITO GONZALEZ CONTRA AS CORDAS?

A Asociación Galega de Mariscadoras remitiu á Fiscalía unha gravación telefónica na que supostamente o patrón maior, Benito González, dialoga cun socio e pon de manifesto a existencia dunha presunta malversación de fondos públicos, segundo a presidenta, Natalia Laíño.

 Na conversación fálase do cobro ilegal de diñeiro para a vixilancia que é sufragado pola Consellería do Mar a favor de intereses privados e o mantemento de contas correntes para recibir donativos á marxe da contabilidade da confraría.

González, que é presidente da Federación Galega de Confrarías, xa foi denunciado no Xulgado de Instrución Número Un por un socio e por Agamar no Tribunal Superior de Xustiza de Galicia por presunta percepción irregular de máis de 78.000 euros ao exercer o cargo de presidente da Federación Galega, que non é remunerado.

Laíño expón que "as gravacións corresponden a unha conversación privada que manteñen socios da confraría co patrón, supostamente é a voz de Benito González, por iso remitiuse á fiscalía, alí decidirán se teñen validez ou serven polo menos para determinar a existencia de irregularidades".

A Consellería do Mar argumentou falta de competencia da Xunta para fiscalizar a disposición de diñeiro público na confraría, extremo co que non está de acordo Agamar. "Entendemos que Mar debe pronunciarse, non acusar, pero a conselleira Rosa Quintana parece que está desaparecida", concluíu Natalia Laíño.

Natalia Laiño