BOMBA EN MEIS

A pota colocada na sede do Partido Popular de Meis, que non chegou a estourar, contiña polvora prensada, pero será o grupo Tedax da Garda Civil quen confirme no laboratorio a primeira hipótese, apuntaron fontes da investigación. 

Ás dez da mañá o Instituto Armado tivo constancia da presenza do artefacto colocado na porta da sede situada na rúa Médico Paz García, de Mosteiro, nas inmediacións do campo de futbol.

Artificieiros do grupo Tedax trasladáronse ao lugar e tras a primeira análise, coa axuda dos cans, comprobaron que se trataba dun artefacto explosivo.

A sede atópase nun edificio de dúas plantas que se atopaba baleiro, pero foron desaloxadas unhas trinta persoas que residen en vivendas lindeiras. O edificio foi acordoado para a súa análise.

O robot dos artificieiros logrou unha apertura controlada da pota que foi trasladada a unha leira onde se procedeu á súa explosión.

O alcalde, José Luís Pérez, do PP, atópase sorprendido: "Pensei que se trataba dunha falsa alarma, pero non foi así, tiña unha bomba con temporizador, estamos preocupados, non lle atopo ningunha explicación", contou a EFE.

O rexedor popular engadiu que "en Meis nunca tiveramos un problema así, é un pobo tranquilo, hai acougo, igual por iso aproveitaron para non ser vistos, quen sabe, non pasou nada e iso é o máis importante, pero lograron preocuparnos".

A colocación do artefacto explosivo non foi reivindicado pero a Garda Civil sospeita que se trata dun grupo independentista.