ROSA QUINTANA VISITA CAMBADOS

Unha obra comprometida desde hai máis de 2 anos

A Consellería do Mar, a través do ente público Portos de Galicia vén de rematar os traballos de construción de novos pantaláns pesqueiros no peirao de Santo Tomé, no municipio pontevedrés de Cambados. Así o comunicou esta mañá a titular do departamento autonómico, Rosa Quintana, nunha visita á zona na que estivo acompañada polo Patrón Maior da Confraría de Cambados, Ruperto Costa, a Concelleira de Mar, María José Cacabelos, o delegado da Xunta en Pontevedra, José Manuel Cores Tourís, e polo presidente de Portos de Galicia, José Juan Durán.

Rosa Quintana explicou que o investimento realizado foi de case 200.000 euros e a nova dotación dá resposta a unha necesidade plantexada de xeito recorrente polo sector profesional da zona. As obras realizadas consistiron fundamentalmente na construción dun pantalán para embarcacións pesqueiras co que se conseguen 73 prazas de atracada: 47 prazas embarcacións de ata 6 metros; 8 prazas para as de ata 8 metros; 12 para as de ata 10 metros e 6 para as de ata 12 metros.

A este pantalán accédese por medio dunha pasarela articulada de estrutura de aluminio e piso de madeira. A atracada das embarcacións realízase por medio de fingers para as embarcacións de ata 12 metros e por medio de brazos de amarre de 5 metros para as embarcacións de ata 6 metros de lonxitude. Como servizos engadidos para a mellora das condicións dos profesionais, os pantaláns contarán con preinstalación de auga e electricidade por canlóns.

Finalmente, Rosa Quintana lembrou que cos traballos executados e en execución ao longo deste ano 2017, en total, a dotación de novas prazas de amarre para o sector pesqueiro na ría de Arousa será de 500 prazas, distribuídas do xeito seguinte: 300 no Xufre (A Illa de Arousa); 125 en Cabo de Cruz (Boiro) e 73 en Santo Tomé (Cambados).

A CONFRARÍA DE CAMBADOS NA CORDA FROUXA

Botadura do "Tragove"

A xunta xeral e o cabildo da confraría de Cambados que dirixe Ruperto Costa terá que resolver un grave problema económico herdado da época na que Benito González estivo á fronte da entidade. O pósito carece de liquidez para pagar os máis de 100.000 euros que lle reclama a Xunta de Galicia pola sobrevaloración do buque "Tragove".
Hai unhas poucas semanas foi notificado  un auto do Tribunal Superior de Xustiza de Galicia (TSXG) de xuño pasado no que se desestima a petición da confraría de aprazar o pagamento á Xunta ata que se resolva o contencioso-administrativo no que a confraría defende que o "Tragove" custou en realidade os 293.000 euros declarados.

B. González

Isto obriga o pósito a pagar canto antes a cantidade reclamada, pois pola contra se arrisca a que a Axencia Tributaria Galega execute o embargo de bens e ingresos do pósito para garantirse o cobramento pendente.
Nunha reunión na que se abordou este espiñento asunto,  acordouse pedir unha reunión coa Consellería do Medio Rural e do Mar para negociar unha saída ao problema. E é que segundo un informe económico elaborado por unha consultora o pósito carece de liquidez abondo para facer fronte ao pagamento dos 100.000 euros, e deixa caer que a única posibilidade de reunir o diñeiro sería rebaixar o salario do equipo ou eliminar servizos.

O equipo da agrupación de pescadores e mariscadores de Cambados está composto por unhas 20 persoas, e xa sufriron entre xuño de 2013 e o mesmo mes de 2014 un Expediente de Regulación de Emprego (ERE) de redución de xornada e salario. 

R. Costa

Un informe demoledor

En maio de 2013 a Xunta de Galicia ordenou á confraría de Cambados a devolución de 84.000 euros ao entender que o pósito cobrara unha subvención maior da que lle correspondía polo buque "Tragove", xa que segundo os técnicos da Xunta o prezo da embarcación fora inflado.

O cabido do expatrón maior -e aínda presidente en funcións da Federación Galega de Confrarías-, Benito González encargou entón a unha consultora un informe económico-financeiro sobre o que suporía para o pósito facer fronte a ese pagamento. O devandito informe rematou en febreiro deste ano e as súas conclusións son demoledoras. Segundo este, a confraría de Cambados está na UCI dende o punto de vista económico.

Os consultores sinalan que a confraría "carece de capacidade financeira para facer fronte ao pagamento desta débeda". Por iso, os autores do informe formulan que "facer fronte á devolución desta axuda implica necesariamente deixar de pagar nóminas, seguros sociais, servizos, subministracións ou taxas ordinarias que automaticamente paralizarían parte da actividade da confraría, co conseguinte risco sobre o normal funcionamento da entidade,".