UN FALECIDO, MÁIS INGRESOS E PEQUENO REPUNTE NA ÁREA PONTEVEDRA-SALNÉS

Coronavirus Pontevedra: 53 contaxios novos e soben a 918 os casos activos

Lixeiro respiro para a área sanitaria pontevedresa, que ten un municipio menos en alerta vermella. A área sanitaria de Pontevedra crece menos que nos últimos días xa que comezan a producirse numerosas altas tras os crecementos das últimas semanas. Desde onte ás 15:00 horas a área urbana de Pontevedra, Poio e Marín está con restricións. Nas últimas 24 horas producíronse 53 contaxios novos, 1 falecemento e 33 altas, o que fai que suban en 19 persoas os casos activos, pasando dos 899 de onte a 918 hoxe. Poio baixa a alerta laranxa, O Grove sobe a alerta laranxa, Cuntis e Vilaboa baixan a alerta amarela, Alerta nivel 3 (vermella): Cambados (34 casos, un máis que onte), Marín, Pontevedra, Ribadumia e Vilagarcía de Arousa. Alerta nivel 2 (laranxa): Cerdedo-Cotobade, O Grove e Poio. Alerta nivel 1 (amarela): Bueu, Caldas de Reis, Cuntis, Sanxenxo, Vilaboa e Vilanova de Arousa. O número de pacientes hospitalizados sobe de 58 a 60 persoas, distribuídos en 53 pacientes no CHU de Pontevedra (47 en planta e 7 na UCI), 5 no Hospital Público do Salnés e 2 no Quirónsalud de Pontevedra. A área sanitaria de Pontevedra-O Salnés inclúe as comarcas de Pontevedra, O Salnés, Caldas (excepto Valga e Pontecesures), Tabeirós-Terra de Montes (salvo a Estrada) e os municipios de Marín e Bueu pertencentes ao Morrazo. Desde o inicio da pandemia tivo 3.377 casos de coronavirus, con 31 falecementos, 2.428 altas e 918 casos activos nestes momentos.