UN NOVO FALECEMENTO E DISPÁRANSE OS CASOS DE CORONAVIRUS EN GALICIA

Novo incremento sensible no balance do impacto do coronavirus en Galicia: os casos activos ascenden xa a 827, o que supón un salto de 87 (109 contando as 22 altas das últimas 24 horas) con respecto á véspera, cando a Consellería de Sanidade informou dun total de 740. Á súa vez o número de casos xa avanzara en 70, e viña de aumentar en 79 un día antes. En total, nos tres últimos balances, 236 casos de alza. De novo, A Coruña absorbe a maior parte dese incremento, ao pasar de 406 a 463 casos activos, un aumento de 57. Nesta área sanitaria, a máis castigada nestes momentos pola covid-19, hai 28 pacientes en planta hospitalaria, nove máis nas últimas 24 horas, sen que se rexistren neste momento ingresos en UCI. A peor noticia: o falecemento dunha muller de 89 anos na área sanitaria de A Coruña, o que eleva o total de decesos na Comunidade a 622.
Esta área está pendente da revisión das medidas restritivas aprobadas o pasado 7 de agosto.
Incrementos salvo en Pontevedra No resto de áreas sanitarias, Vigo pasa de 108 a 116 (+8); Lugo, de 80 a 84 (+4); Ourense, de 49 a 54 (+5); Pontevedra mantense en 45; Santiago avanza de 41 a 45 (+4) e Ferrol salta de 11 a 20. Segundo o Sergas, en toda Galicia hai tres pacientes en UCI e 35 en unidades de hospitalización (co maior peso asistencial na Coruña, de forma folgada). Hai 789 galegos afrontando a enfermidade nos seus domicilios. Non hai novidades nas residencias sociosanitarias, onde seguen afectados tres usuarios de Matogrande (A Coruña) e dous traballadores (Xove e Paradela), segundo o último balance da Consellería de Política Social. Curáronse 11.476 (22 máis que onte) persoas desde o inicio da pandemia e realizáronse 269.448 PCR.