AUMENTAN DE FORMA CONSIDERABLE OS CASOS NA ÁREA PONTEVEDRA-SALNÉS

Subida de casos de coronavirus por décimo cuarto día consecutivo. Cos datos recolleitos hoxe e trasladados este xoves pola Consellería de Sanidade, os enfermos de coronavirus diagnosticados en Galicia son 412, seis máis (44 contando as altas) que a cifra ofrecida no último balance polo Sergas. Os casos baixan nas áreas da Coruña e Lugo e soben no resto, excepto Ferrol que se mantén. Así pois, hai 156 casos activos na Coruña (-5), 75 na de Vigo (+1) e colócase segunda, 73 en Lugo (-1), 41 en Pontevedra (+6), 32 en Ourense (+3), 30 en Santiago (+2) e 5 en Ferrol, que se mantén. As UCI galegas seguen igual, con dous pacientes ingresados. As hospitalizacións baixan de 18 a 17, xa que un paciente foi dado de alta. Isto fai que 393 persoas estean en domicilio (+7) e 11.369 persoas curáronse (+38), o que, se se fixese un cálculo rápido daría 44 novos positivos no último día, un dato que non ofrece o Sergas. Case 2.000 PCR novas fixéronse nas últimas horas, chegando a 258.978. Nas últimas horas coñecéronse positivos relacionados co caso importado desde México e o peche dunha tenda no centro comercial coruñés de Marineda City por un caso.

PONTEVEDRA-SALNÉS

Once contaxios novos reportou este xoves o Sergas na Área Sanitaria de Pontevedra-O Salnés.

Todos eles permanecen asintomáticos ou leves nos seus domicilios.

Mantense un paciente COVID hospitalizado en planta do Complexo Hospitalario Universitario de Pontevedra.

Respecto ao día de onte curáronse 5 pacientes máis situando o total de persoas curadas en 925 desde o inicio do plan de continxencia do COVID-19. En total son 41 casos activos.